Na’e kamata ‘a hono fokotu’u ‘ae kautaha koe SAINEHA ALUMNI ‘e ha fanauako ne nau ‘i he ‘Apiako Ma’olunga Saineha (Kolisi Tutuku Saineha) ‘a ia ‘oku nau lolotonga ‘i ‘Amelika ni pea moe ngaahi feitu’u kehe hange ko Nu’usila, ‘Aositelelia pea mo Ha’amoa. Na’e ta tu’olahi ‘ae ‘amanaki ke fakahoko ‘ae fakakaukau ni ‘i he ngaahi ta’u lahi kuo hili moe ‘ikai pe ke lava hano ngaue’i ‘ae ngaahi fakakaukau ni, makatu’unga pe ‘i he lotosi’i pea moe ‘ikai ha taukei fe’unga.

Ka ‘i he 2004 na’e toe fakalalahi ange ai ‘ae lotofeinga moe hoholi ‘ae Kolisi Tutuku Saineha ‘o fokotu’u ai ha kautaha koe SAINEHA ALUMNI, ke fakamo’oni’i’aki ‘ae vilitaki, ‘ofa moe faka’amu ki ha faingamalie fakaako ma’ae fanauako lolotonga ‘oe ‘Apiako Ma’olunga Saineha, ngaahi Kolisi kehe, pea moe lautohisi’i ‘a e Pule’anga ‘i he vahe fonua Vava’u.

Na’e fakahingoa ‘ae kautaha ni koe SAINEHA ALUMNI ASSOCIATION OF AMERICA pea na’e toe liliu ‘a e hingoa ‘i he lototaha pe ‘ae Kolisi Tutuku Saineha ke fakahingoa koe SAINEHA ALUMNI.

Koe ngaahi liliu ‘oe hingoa mo hono paasi ‘oe ngaahi taumu’a ngaue kotoa pe ‘ae kautaha ni na’e fakahoko ia ‘i Siulai ‘oe 2005 ‘i ha fakataha lahi ‘ae Kolisi Tutuku Saineha na’e fakahoko ki Kalefonia.

Ka ‘i he lolotonga ni ‘oku fakahoko ’ae ngaahi kumi tokoni ‘ae kautaha ni ‘a ia ‘e foaki ‘i he ta’u kotoa pe ki he ‘Apiako Ma’olunga Saineha pea moe ngaahi ako kotoa pe ‘i he vahe fonua Vava’u. ‘Oku kau foki ‘i he taumu’a ngaue ‘ae kautaha ni ke tokoni ki Tonga kotoa, pea pehe ki he ngaahi fonua makehe mei Tonga.